නාවික හමුදාව විසින්  දකුණු මුහුදේදී අනතුරට පත් ධීවරයින් 10 දෙනෙකු බේරා ගැනීමට සමත්ව ඇත.

දකුණු නාවික විධානයට අයත් වෙරළබඩ මුර යාත්‍රාවකට අනුයුක්ත නාවිකයින් පිරිසක් විසින් අම්බලන්ගොඩ ප්‍රදේශයට ඔබ්බෙන් වූ මුහුදේදී සිය ධීවර යාත්‍රාව පෙරළීම හේතුවෙන් අනතුරට පත්ව සිටි ධීවරයින් 10 දෙනෙකු මෙලෙස බේරා ගෙන ඇත.

මෙම එක්දින ධීවර යාත්‍රාව  හික්කඩුව ධීවර වරායෙන් ධීවර කටයුතු සඳහා පිටත්ව ‍ගොස් ඇත.

මෙම අනතුර සම්බන්ධයෙන් තොරතුරු ලද විගස නාවික හමුදා මුලස්ථානයේ උපදෙස් මත මුර සංචාරයේ නියුතුව සිටි නාවික හමුදා යාත්‍රාව එම ධීවරයින් මුදවා ගැනීමේ මෙහෙයුම් සඳහා යෙදවීමට කටයුතු කෙරිණ.

ඒ අනුව ගාල්ල ප්‍රදිපාගාරයට නාවික සැතපුම් 20 ක් දුරකදී  අදාල ධීවරයින් නාවික හමුදා යාත්‍රාව මඟින් සොයා ගැනීමට සමත් විය.

ඉන් අනතුරුව නාවික හමුදා යාත්‍රාව මඟින් එම ධීවරයින් නිරුපද්‍රිත ලෙස ගාල්ල වරාය පරිශ්‍රය වෙත රැගෙන එමෙන් පසු එම ධීවරයින් ඔවුන්ගේ ඥාතීන් වෙත භාර දී ඇත.